Protesta 1 orëshe e opozitës në Tiranë është duke gjetur pasqyrim të gjerë në mediat ndërkombëtare.
Që nga ato, italiane, greke dhe deri në SHBA kanë pasqyruar protestën e sotme 1 orëshe dhe paqësore të zhvilluar në Shqipëri.
Mediat ndërkombëtare kanë pasqyruar protestën e sotme të opozitës duke vënë në dijeni faktin se ajo u zhvillua pa incidente. “Associated Press” shkruan se mbështetësit e opozitës shqiptare bllokuan 5 kryqëzime kombëtare sot për një orë, ndërsa citohet deklarata e kryetarit Basha se protesta ishte kundër trafikut të drogës, krimit, trafikut të votave, kundër korrupsionit dhe pastrimit të parave.
“Birn” shkruan më tej se, përshkallëzimi i planifikuar i protestave mund të pengojë çdo mundësi kompromisi. Kriza shihet me shqetësim në Bruksel sepse po pengon zbatimin e reformave të rëndësishme gjyqësore, faza e parë e së cilës përfshin verifikimin e rreth 800 gjyqtarëve dhe prokurorëve. Lajmi është pasqyruar dhe në “Fox News” dhe “Daily Mail”.
